| Procesi i anëtarësimi në NATO i Gjeorgjisë dhe Ukrahinës do të jetë i gjatë | |
| Al Pessin Uashington 22-03-2008 |
Pentagoni tha se mbështetja nga Shtetet e Bashkuara rreth përpjekjeve të Gjeorgjisë dhe Ukrahinës për anëtarësimin në NATO nuk do të thotë që këto vende të anëtarësohen shumë shpejt. Një zëdhënës tha se Sekretari i Mbrotjes, Robert Geits, mendon se është koha të fillohet të veprohet, megjithëse ky mund të jetë një proces i gjatë.
Sipas zëdhënësit, Sekretari Geits, gjatë një takimi të enjten në Pentagon me Presidentin e Gjeorgjisë, Mikail Saakashvilli, diskutoi përpjekjet e Gjeorgjisë për fillimin e procesit të anëtarësimit në NATO. Ky diskutim u zhvillua një ditë pasi Presidentit Bush u takua me presidentin gjeorgjian dhe tha se ai, në samitin e Bukureshtit muajin e ardhshëm, do t’i bëjë thirrje udhëheqësve të NATO-s të miratojnë planin e përgatitjeve për anëtarësim të Gjeorgjisë.
Rusia kundërshton planin që ish-republikat sovjetike t’i bashkohen aleancës perëndimore. Por, Sekretari i Shtypit i Pentagonit, Xhef Morell, tha se, qoftë dhe me planin e përgatitjeve për anëtarësim, shanset janë se do të duhet kohë që kjo të realizohet.
“Mendoj se është e rëndësishme të mos ngatërrohet plani i përgatitjeve për anëtarësim me anëtarësimin. Ju e dini se tre vendet që presin të anëtarësohen në Bukuresht, Kroacia, Shqipëria dhe Maqedonia, kanë pothuajse gjithë dekadën e fundit që përgatiten sipas këtij plani. Kështu, ky mund të jetë një proces i gjatë. Plani është hartuar të inkurajojë reformat demokratike dhe ushtarake dhe gjatë kësaj kohe, në një farë mënyre, vendet të kuptojnë progresin që ato kanë bërë”, tha zëdhënësi i Pentagonit.
Zoti Morell theksoi se vendet me një plan përgatitjesh për anëtarësim nuk janë nën mbrojtjen e aleancës, vetëm nëse, dhe deri sa ata faktikisht janë anëtarë, gjë që duhet miratuar nga të gjitha vendet e tjera anëtare.
Udhëheqësit e NATO-s, pritet që në takimin e tyre në prill, të bëjnë ftesa zyrtare për Kroacinë, Shqipërinë dhe Maqedoninë. Shqipëria dhe Maqedonia kanë punuar për nëntë vjet sipas planeve të anëtarësimit, ndërsa Kroacia për gjashtë vjet. //af
Kriza e ndodhur qeveritare në Maqedoni, pas kërcënimeve të Partisë Demokratike Shqiptare (PDSH) për lëshim të koalicionit qeverisës, janë shkaku pse Maqedonia vonohet në pranimin e pavarësisë së Kosovës. Këtë informacion fillimisht e kaliferuar Radio Televizioni i Kosovës (RTK), kurse të enjten e ka konfirmuar edhe kryeministri kosovar Hashim Thaçi si dhe nënkryetari i Bashkimit Demokratik për Integrim (BDI), Rafiz Haliti. Pas takimit me kreun e BDI-së Ali Ahmetin, kryeministri i Kosovës Hashim Thaçi ka përsëritur edhe njëherë se çështja e njohjes së pavarësisë nga Maqedonia është punë e kryer. Ai madje tha se vendimi është marrë më herët për këtë çështje por ka “mbetur i ngrirë” për shkak të zhvillimeve të fundit në Qeverinë e Maqedonisë. Ndërkohë BDI ashpër e ka sulmuar PDSH-në se me veprimet e papërgjegjshme për dalje nga Qeveria e ka vonuar procesin e njohjes së Kosovës nga ana e Maqedonisë. “Sjellja e papërgjegjshme e PDSH-së e ka vonuar njohjen e pavarësisë së Kosovës nga ana e Maqedonisë. Të gjitha informatat tona flasin se njohja e Kosovës nga Maqedonia është dashur të bëhet të mërkurën në pako me Kroacinë, Hungarinë dhe Bullgarinë”. Kështu ka akuzuar partinë e Menduh Thaçit, nënkryetari i BDI-së, Rafiz Haliti. Sipas tij, kjo nuk ka ndodhur për shkak se realisht Maqedonia është me qeveri teknike e cila nuk ka legjitimitet që të bëjë njohjen e Kosovës.
